Síðari hálfleikur snarprar kolmunnalotu hófst í morgun í fiskimjölsverksmiðju Vinnslustöðvarinnar þegar byrjað var að landa 1.950 tonnum úr Ísleif til bræðslu. Kap kom til hafnar skömmu síðar með 1.500 og bíður löndunar og Huginn er á heimleið líka af miðunum sunnan Færeyja með 1.900 tonn. Skipin eru öll að koma úr öðrum túr sínum á kolmunna.

„Afköst verksmiðjunnar í kolmunna eru 700-800 tonn á sólarhring. Við bræddum í átta sólarhringa í fyrri hálfleik og svo var hlé. Nú er hafinn síðari hálfleikur og verður að lágmarki 8 til 9 sólarhringar. Líklega fer leikurinn í framlengingu og þá má ætla að uppbótartíminn verði 5 sólarhringar,“ segir Unnar Hólm Ólafsson verksmiðjustjóri.

Ísleifur fer nú í slipp fyrir sunnan til undirbúnings makrílvertíð en Kap og Huginn taka í þriðja og síðasta kolmunnatúrinn hvort skip og klára kvóta VSV og Hugins, samtals um 14.000 tonn.

„Ég er ánægður með ganginn í þessu. Fínn fiskur og veiðarnar hafa gengið ágætlega,“ segir Sindri Viðarsson, sviðsstjóri uppsjávarsviðs VSV.

• Unnar Hólm tók meðfylgjandi myndir í dag. 
  • Á þeim efstu tveimur er Ísleifur við löndunarkantinn og Kap bíður átekta fjær.
  • Löndun úr Ísleifi.
  • Síðastar í röðinni eru myndir af gufuþurrkrum fyrir mjölið í verksmiðjunni, sekkjunarstöðvum fyrir mjöl og að síðustu af mjöli í risasekkjum, sístækkandi lager þessa dagana í skemmu sem tekin var í gagnið 2018.